Kryetari i Bashkësisë Islame të Kosovës, Myftiu Naim Tërnava i është drejttuar opinionit publik dhe gjithë besimtarëve myslimanë sot me rastin e fillimit të muajit të shenjtë të Ramazanit.
Tërnava ka theksuar se Ramazani është një muaj madhështor në të cilin shumëfishohen veprat e mira dhe falen mëkatet për ata që agjërojnë dhe falin namazin me besim dhe devotshmëri.
“Besimtarët myslimanë me të drejtë e përjetojnë me përkushtim ardhjen e muajit të mirësisë, devotshmërisë, sakrificës, dhe faljes së mëkateve. Muaji që na paraqet gëzim, begati, lumturi, shëndet dhe paqe si te fëmijët, të rinjtë tek gjyshi e gjyshja, tek nëna dhe babai. Andaj, porositemi që të shtojmë adhurimet dhe veprat e mira. Kanë mbetur edhe pak orë e të shfaqet në tërë botën gjysmë hëna e muaji Ramazan, muajin që e dëshirojnë zemrat dhe shpirtat e besimtarëve, muaji që me mall e presim ardhjen e tij për t’iu bashkuar në mëshirë dhe falje, një muaj që begaton edhe më shumë sofrat tona. Për besimtarët është një dëshirë e madhe që t’i shfrytëzojmë të mirat e veçanta që sjellë ky muaj”.
“Me rastin e fillimit të këtij muaji të bekuar, këshilloj vëllezërit dhe motrat e mi kudo që janë që të kenë frikë nga Zoti i Madhëruar, të garojnë në vepra të mira, të urdhërojnë njëri-tjetrin për të bërë mirë, të jenë të durueshëm ta ruajnë unitetin e të mos përçahen, të bashkëpunojnë në mirësi, urtësi dhe devotshmëri, si dhe të ruhen nga të gjitha ato mëkate që Zoti i ka ndaluar. Kjo ngase Ramazani është një muaj madhështor, muaj në të cilin shumëfishohen veprat e mira dhe falen mëkatet për ata që agjërojnë dhe falin namazin me besim dhe devotshmëri, duke kërkuar kështu shpërblimin për punët e tyre”, ka theksuar Myftiu.
Tërnava u drejtohet sot besimtarëve me rastin e fillmit të Ramazanit
