Një zyrtar policor është plagosur sot pasdite, pas një grabitjeje të armatosur nga katër persona në një argjendari në Suharekë.
Ekipi i Tëvë1, i cili aktualisht ndodhet në vendngjarje, bëri të ditur se Drejtori Rajonal i Policisë së Prizrenit, Faton Alija, ka njoftuar se ka dyshime që grabitësit janë nisur në drejtim të qytetit të Ferizaj.
“Këtu ishte edhe Drejtori Rajonal i Policisë së Prizrenit, Faton Alija, i cili tha se pas marrjes së informatës janë aktivizuar të gjitha njësitë relevante, teksa bëri të ditur që dyshimet fillestare të tyre janë që të dyshuarit janë nisur në drejtim të qytetit të Ferizaj, po ashtu bëri të ditur se vetura është arritur të identifikohet dhe dyshohet që është veturë e vjedhur”, deklaroi gazetari Lindrit Zejnullahu.
Po ashtu, bëhet e ditur se Kryeprokurori i Prizrenit, Admir Shala, ka njoftuar që bëhet fjalë për qindra apo mijëra euro të vjedhura nga grabitësit.
“Në vendngjarje ka qenë edhe kryeprokurori i Prizrenit, Admir Shala, i cili tha se janë në fazën e parë të hetimeve. Megjithatë, i pyetur sa dyshohet që është shuma e vjedhur, ky i fundit tha se bëhet fjalë për qindra mijëra euro”, shtoi tutje Zejnullahu.
