Qeveria e Kosovës ka lansuar një masë të re të punësimit për gratë dhe vajzat të cilat janë viktima të dhunës.
Sa i përket ecurisë së kësaj procedure, Ministrja e Drejtësisë, Albulena Haxhiu, tha se të mbijetuarat e dhunës që do të aplikojnë, do të jenë në konfidencë të plotë, kështu duke ruajtur sigurinë e tyre.
“Sot, lansohet masa për punësimin e të mbijetuarave të dhunës, ndërsa urojmë që shumë shpejtë Gjykata Kushtetuese të japë vendimin për byronë për konfiskimin e pasurisë të pajustifikueshme. Në komunikim me ministrin e Financave, kemi theksuar që është e rëndësishme që pasuritë të cilat konfiskohen nga personat të cilat i kanë krijuar në mënyrë të pajustifikueshme, t’u jepen kategorive që kanë më së shumti nevojë dhe ato janë të mbijetuarat e dhunës në familje. Ne do t’i japim informacionet e sakta se kush nga personat që aplikojnë është e mbijetuar e dhunës në familje, mirëpo kjo do të jetë në konfidencë të plotë për ta ruajtur sigurinë e grave”, deklaroi Haxhiu gjatë aktivitetit në kuadër të fushatës “16 Ditët e Aktivizmit Kundër Dhunës me Bazë Gjinore”.
Po ashtu, Haxhiu tha se synim i kësaj fushate ndërlidhet kryesisht me fuqizimin ekonomik të grave.
“Kjo është njëra nga aktivitetet më të rëndësishme, pra ndërlidhet me fuqizimin ekonomik të grave, apo punësimin e grave të cilat janë të mbijetuara të dhunës në familje. Shumica e grave të cilat janë të mbijetuara të dhunës në familje, janë të papuna. Pra, sfida më e madhe e tyre është mungesa e një vendi të punës, sikurse edhe e strehimit”, shtoi tutje Haxhiu.
Më tej, kjo e fundit shtoi se Ministria e Drejtësisë do të ketë rol kyç në bashkëpunimin me agjencinë e punësimit, po ashtu me strehimoret./teve1.info/.
