Shefi i Grupit Parlamentar të Partisë Demokratike të Kosovës, Abelard Tahiri ka deklaruar se çdo herë që ka shpërfaqje të skandaleve nga Qeveria Kurti, deputetët e kësaj partie dalin në foltoren e Kuvendit dhe flasin për Serbinë, për Radoiçiqin, e për mundësinë e sulmeve, kjo sipas tij, vetëm e vetëm për t’i ikë një debati për skandalet e Qeverisë.
Madje Tahiri renditi edhe disa prej “skandale” të cilat sipas tij, kanë ndodhur që nga e hëna e kësaj jave.
“Sa herë që kemi shpërfaqje të skandaleve të kësaj Qeveria, deputetët e mazhorancës dalin në foltore dhe flasin për Serbinë, flasin për Radoiçiqin, flasin për Serbinë, flasin për mundësinë e sulmeve vetëm e vetëm për t’i ikë një debati për skandalet të cilat jemi duke i diskutuar këto ditë, pra që nga e hëna e tutje.
Skandalet janë aq të mëdha saqë vërtetë është problem dhe nuk e din njeri me cilin me fillu. A me fol për Gani Jakupin, çysh vendi më i varfër në Evropë i ofron një pagë një këshilltari të kryeministrit rreth 7 mijë e 500 euro. Apo me folë për sulmet që po bëhen nëpër qytetet e Kosovës dhe grabitjet me armë të gjata, nëtë cilat ballafaqohet Policia e Kosovës pa mbështetjen e kësaj Qeverie. Apo me folë për Instititin e Mjekësisë Ligjore për të cilën ende nuk e kemi një raport për me pa se çka ka ndodhë dhe dëmet që janë bërë në këtë Institut”, tha Tahiri në foltoren e Kuvendit.
Derisa shtoi se Qeveria e dështoi me qëllim nisjen e procesit të regjistrimit të popullsisë pasi sipas Tahirit, kjo do ti shpërfaqte shifrat alarmante të largimit të qytetarëve nga Kosova.
“Apo me folë për dështimin e popullsisë të cilën Qeveria e Kosovës e dështoi me qëllim, vetëm e vetëm për mos ta nxjerrë numrin e saktë të popullsisë në Republikën e Kosovës, sepse është e qartë që shifrat e migrimit të qytetarëve të Kosovës janë të frikshme”, shtoi Tahiri./teve1.info./
