Shefi i Grupit Parlamentar të Aleancës për Ardhmërinë e Kosovës, Besnik Tahiri, tha se tani nuk është momenti i duhur që të ketë betejë politike mes opozitës e pozitës.
Tahiri u shpreh kështu gjatë debatit parlamentar në Kuvend, ku në rend dite është miratimi i deklaratës në mbështetje të rezolutës së Parlamentit Evropian, mbi zhvillimet e fundit në dialogun Kosovë-Serbi, përfshirë situatën në komunat veriore.
Njëherit, ka kritikuar Lëvizjen Vetëvendosje për mungesë në këtë seancë të veçantë, raporton teve1.info.
“Nuk është sot koha për një betejë politike mes opozitës dhe pozitës. Qëllimi i vetëm është që si Kuvend ta bëjmë një veprim s’paku të shprehim një falënderim dhe po ashtu ta konfirmojmë qëndrimin tonë politik në raport me rezolutën e Parlamentit Evropian. E shoh si veprim të pandërgjegjshëm e të pamatur, e me thënë të drejtën po e shoh si një frikë nga Vetëvendosja për tu mos ballafaquar me Kuvendin e Kosovës. Nuk e di pse nuk janë këtu, e nuk e di çka po i frikëson kaq shumë të mos ballafaqohen këtu në Kuvend”, deklaroi Tahiri para deputetëve në Kuvend.
Parlamenti Evropian ka miratuar rezolutën me të cilën dënon sulmin në Banjskë të Zveçanit më 24 shtator, ku u vra rreshteri Afrim Bunjaku. Në rezolutë, sulmi cilësohet terrorist dhe do të kërkojë përgjegjësi nga Serbia nëse dëshmohet lidhja e drejtpërdrejtë e Beogradit me këtë ngjarje./teve1.info/.
