Deputeti i Partisë Demokratike të Kosovës, Arian Tahiri, së bashku me Altin Krasniqin, djalin e ish-kryeparlamentarit Jakup Krasniqi, kanë dalë te protestuesit në shesh, ku janë deklaruar lidhur me zhvillimet rreth Projektligjit për ndryshimin dhe plotësimin e Ligjit për Dhomat e Specializuara.
Tahiri ka bërë thirrje sërish ndaj kryeministrit Albin Kurti dhe deputetëve të Lëvizjes Vetëvendosje që të kthehen në Kuvend dhe të marrin pjesë në votimin e dytë të Projektligjit.
Ai ka thënë se në ambientet e Kuvendit aktualisht ndodhen deputetët e PDK-së dhe AAK-së, ndërsa, sipas tij, deputetët e VV-së dhe LDK-së nuk janë në sallë.
“Qytetarët me të drejtë kanë kërkuar që deputetët të qëndrojnë në Kuvendin e Kosovës. Do të jemi edhe në shesh edhe në Kuvendin e Kosovës deri në minutat e fundit, sa të përfundojë mandati. Janë të gjithë deputetët e PDK-së dhe Aleancës. Deputetët e Lëvizjes Vetëvendosje nuk janë në Kuvendin e Kosovës”, ka thënë Tahiri.
Tahiri ka kërkuar që çështja e miratimit të ligjit të mos lidhet me zgjedhjen e presidentit.
“Kanë mbetur vetëm edhe disa orë. Krejt çka po kërkojmë është që Albin Kurti dhe deputetët e Lëvizjes Vetëvendosje të kthehen në Kuvendin e Kosovës. Ligji është obligim kombëtar të votohet, është urgjencë. Po tentohet të krijohet si pazar politik çështja e presidentit. Ligji është obligim kombëtar, presidenti përgjegjësi politike. Në këto rrethana është shumë e rëndësishme të krijohet konsensus. E rëndësishme është që ligji të votohet, por nuk duhet të lidhet me çështjen e presidentit”, është shprehur Tahiri.
Ndërkaq, Altin Krasniqi ka thënë se të gjithë deputetët duhet të jenë në Kuvend dhe të marrin pjesë në votimin e Projektligjit.
“Nuk është çështje politike Ligji për Specialen. Ata duhet të jenë në Kuvend të votojnë ligjin dhe të mos e kthejnë në çështje politike dhe të procedohet me çështje të tjera. Protestuesit po bëjnë protestë të qetë, prandaj edhe në mënyrë proporcionale duhet të jetë edhe përgjigjja e Policisë së Kosovës”, ka deklaruar Krasniqi.
