Shefi i Grupit Parlamentar i Aleancës për Ardhmërinë e Kosovës, Besnik Tahiri, i bëri thirrje kryeministrit të vendit, Albin Kurti, të tregojë patjetër për çka iu është zotuar liderëve evropianë dhe për çka nuk po e mban fjalën.
Kjo u tha nga Tahiri në kuadër të diskutimit për deklaratën e presidentit francez, Emmanuel Macron, në lidhje me liberalizimin e vizave, i cili ka thënë që Kosova nuk po e mban fjalën e dhënë.
“Komunikimi nga presidenti Macron u keqinterpretua. Mirëpo, në një fjali Macron nuk u keqinterpretua. Ai tha që Kosova nuk po e mban fjalën e dhënë. A ka mundësi që kryeministri i Kosovës të vijë t’i tregojë Kuvendit dhe qytetarëve, çfarë premtimi u ka dhënë liderëve evropianë, për çka është zotuar si udhëheqës i Qeverisë së Kosovës dhe për çka nuk po e mban fjalën”, deklaroi Tahiri gjatë seancës plenare në Kuvend.
Madje sipas tij, Kosova nuk duhet ta anashkalojë një deklaratë të tillë nga një prej liderëve kryesorë botërorë, siç është presidenti francez, Emmanuel Macron.
“Qeveria e Kosovës është e obliguar t’i tregojë Kuvendit ku, çka dhe cili është zotimi i tyre”, shtoi tutje Tahiri./teve1.info/.
