Komiteti Olimpik i Kosovës (KOK) i ka reaguar Federatës së Futbollit të Kosovës (FFK) në lidhje me Këshillin e Arbitrazhit Sportiv, duke thënë se KAS-i është organ i pavarur dhe se nuk ndikojnë në vendimet e tij.
Sipas KOK-ut, secila ndërhyrje në vendimet e KAS-it, dëmton edhe frymën e bashkëpunimit ndërinstitucional në sportin kosovar.
KAS-i, ditë më parë vendosi që vendimi i FFK-së për të mos licencuar FC Prishtinën për sezonin 2023/24 të garave evropiane ishte i padrejtë.
Nuk vonoi shumë dhe erdhi reagimi i FFK-së, që tha se vendimi i KAS-it ishte konflikt interesi pasi nuk ishte nënshkruar nga të gjithë anëtarët e tij dhe përmban parregullsi të shumta ligjore e procedural.
Madje, paralajmëroi padi e kallëzim penal në institucionet e drejtësisë në Kosovë, si dhe shkroi se do ta njoftoi edhe CAS-in në Llozanë.
Gjithashtu, FFK-ja paralajmëroi edhe largimin nga KOK-u, i cili në reagimin e tij tha se ishte pikërisht federata e futbollit, ajo që e kishte propozuar Eroll Salihun për kryetar të KAS-it.
“KAS është një organ i pavarur, i cili zgjidhet nga Asambleja e Përgjithshme e KOK-ut dhe funksionon në përputhje me legjislacionin sportiv dhe standardet ndërkombëtare të drejtësisë sportive. Anëtarët që e përbëjnë KAS-in zgjidhen po ashtu nga Asambleja e KOK-ut për ciklin olimpik 2021-2025 dhe pikërisht z. Eroll Salihu, si kryetar i KAS-it, është propozuar nga FFK-ja për anëtar, sikurse anëtarët tjerë nga federatat tjera”, thuhet në reagim të KOK-ut.
Më tej, KOK-u ka bërë të ditur se KAS-i nuk i raporton për vendimet që i merr ashtu siç kishte pretenduar FFK-ja në reagimin e saj.
KOK-u në reagim ka vlerësuar lart kontributin e FFK-së dhe çdo federate tjetër për punën por ka shtuar se kërcënimet dhe presionet për shqyrtim të anëtarësisë në KOK, për shkak të një vendimi të KAS-it, janë të papranueshme dhe të cilat tentojnë të ndikojnë në rolin e KAS-it dhe pavarësinë e tij.
Prishtina në sezonin 2023/24 në garat evropiane u zëvendësua nga Dukagjini, ndërsa KAS-i vendimin për këtë çështje e ka marrë pas 17-të muajsh.
