Ministri i Punëve të Brendshme, Xhelal Sveçla ka thënë se puna e palodhshme e gjithë zyrtarëve policor në veri, si dhe e atyre që janë të vendosur në çdo cep të Kosovës garanton mbrojtje e siguri.
Sveçla ka deklaruar kështu pas vizitës që ka zhvilluar të mërkurën në veri së bashku me presidenten Vjosa Osmani dhe drejtorin e Policisë, Gazmend Hoxha.
Sipas tij sfidat e vitit 2024 nuk i kanë ndalur por i kanë forcuar dhe ka uruar që edhe në vitin 2025 të gëzojnë suksese të përbashkëta, për Kosovën.
“Në mbyllje të vitit 2024, me Presidenten e Republikës së Kosovës znj. Vjosa Osmani Sadriu, Drejtorin e Përgjithshëm të Policisë Gazmend Hoxha dhe Zëvëndësdrejtorin Fehmi Hoti vizituam zyrtarët e Policisë së Kosovës në Drejtorinë Rajonale të Mitrovicës së Veriut. Puna e palodhshme e gjithë zyrtarëve policor, atyre që takuam dhe e atyre që janë të vendosur në çdo cep të vendit tonë, garanton mbrojtje e siguri për Republikën tonë. Sukseset e Republikës sonë ju takojnë atyre që janë të gatshëm të sakrifikojnë edhe jetën e tyre për sigurinë e qytetarëve tanë pa dallim dhe vendit tonë. Sfidat e vitit 2024 nuk na kanë ndalur dhe na kanë forcuar, në vitin 2025 uroj të gëzojmë suksese të përbashkëta, për Republikën tonë”, ka shkruar ai në Facebook.
