Ministri i Punëve të Brendshme, Xhelal Sveçla ka kërkuar që të hetohet zyrtari i ministrisë që ai drejton, pas raportimeve se i njëjti dyshohet që ka shfrytëzuar parkingun e këtij institucioni si ‘Rent a car’.
“Po ashtu, nga dita e parë e punës do të inicoj auditim të jashtëzakonshëm për shfrytëzimin e këtij parkingu. Në të njejtën kohë edhe Komisioni Disiplinor pranë Ministrisë së Punëve të Brendshme, duhet të angazhohet për të identifikuar të gjitha shkeljet dhe të ndërmarrë masat e parapara me ligj”, ka shkruar Sveçla.
Ministri ka falënderuar gazetarët për raportimin rreth dyshimeve për këtë keqpërdorim.
“Si Ministri e Punëve të Brendshme, por edhe si Qeveri, jemi angazhuar maksimalisht që të gjithë shërbyesit civilë të jenë në nivelin më të lartë të detyrës, por edhe ndaj të gjithë keqpërdoruesve të detyrës zyrtare kemi vepruar pa asnjë mëdyshje. Mbi 300 zyrtarë publikë janë arrestuar nga Policia e Kosovës për mënyra të ndryshme të keqpërdorimit të detyrës zyrtare”, ka shkruar Sveçla
