Sveçla në një video-adresim në Facebook, ka thënë se qytetarët veçse kanë filluar regjistrimin e automjeteve të tyre dhe se procesi dymujor, i cili përfundon më 31 tetor, është mundësia e fundit që të gjithë pronarët që posedojnë mjete me targa ilegale t’i kthejnë ato në targa RKS.
“Ky proces ofron lehtësira të mëdha, duke filluar nga regjistrimi i mjeteve më të vjetra se 10 vjet, si dhe lirimin nga taksa doganore, taksa administrative në Qendrën e Regjistrimit të Automjeteve, tarifa për targën, taksën për pajisje me certifikatë të regjistrimit të mjeteve. Gjithashtu, nga tani e tutje, ju mund të regjistroni mjetet me targat e regjionit tuaj në të gjitha qendrat për regjistrimin e automjeteve, pavarësisht vendbanimit apo vendqëndrimit tuaj në Republikën e Kosovës”, tha ai.
Tutje ai ka thënë se ministria që ai drejton është e përkushtuar që procesi i regjistrimit në targa RKS të përmbyllet me sukses deri në afatin e paraparë.
Teksa ka theksuar se veturat të cilat posedojnë targa ilegale pas kësaj date, nuk do të mund të qarkullojnë në territorin e Kosovës, si dhe në pikë kalimet kufitare.
“Ju bëjmë thirrje që, pa humbur kohë, të shfrytëzoni këtë mundësi. Pas kësaj date, veturat të cilat posedojnë targat ilegale nuk do të mund të qarkullojnë në territorin e Republikës së Kosovës, si dhe në pikë kalimet kufitare. Liria e lëvizjes barazia, por edhe sundimi i ligjit në tërë territorin, pa dallim, mbeten prioritet i ynë, andaj, ju ftojmë që deri më 31 tetor, të shfrytëzoni këto lehtësira dhe të bëni kthimin e targave ilegale në targa legale RKS”, ka thënë ai.
