Një zyrtar policor me detyrë në Stacionin Policor Kufitar në Aeroportin Ndërkombëtar të Prishtinës “Adem Jashari” është suspenduar me pagesë, pas dyshimeve se nuk i ka trajtuar në përputhje me procedurat një shumë prej 105 eurosh, të gjetura në hapësirat e aeroportit.
Rasti është pranuar nga Inspektorati Policor i Kosovës më 14 shtator 2026, pasi ishte referuar nga Policia e Kosovës.
Sipas informatave fillestare të siguruara gjatë hetimit, më 9 shtator një punonjës i aeroportit kishte raportuar humbjen e 105 eurove.
Gjatë veprimeve hetimore dhe shqyrtimit të pamjeve nga kamerat e sigurisë, IPK-ja ka konstatuar se paratë ishin gjetur nga një udhëtare, shtetase e Kosovës me banim në Gjermani. Ajo më pas ia kishte dorëzuar paratë një zyrtari policor.
Pas pranimit të rastit, hetuesit e IPK-së kanë ndërmarrë veprimet e nevojshme për sigurimin dhe administrimin e informatave dhe provave fillestare.
Sipas shkresave të pranuara për rastin, zyrtari policor ka pranuar se kishte marrë paratë, por nuk i kishte dorëzuar dhe trajtuar ato në pajtim me procedurat ligjore dhe institucionale të parapara për raste të tilla.
IPK-ja ka bërë të ditur se, më vonë, zyrtari policor i kishte vendosur paratë në kutinë e donacioneve të një organizate bamirëse në aeroport.
Duke vlerësuar se ekziston dyshimi i arsyeshëm dhe me qëllim të sigurimit të kushteve për zhvillimin e papenguar të hetimeve, IPK-ja i ka rekomanduar Policisë së Kosovës suspendimin me pagesë të zyrtarit policor.
Hetimet po zhvillohen në drejtim të veprave penale “Përvetësimi në Detyrë” dhe “Shpërdorimi i pasurisë së huaj”.
IPK-ja ka njoftuar se hetuesit, në koordinim me Prokurorinë, do të vazhdojnë me ndërmarrjen e veprimeve të tjera hetimore me qëllim të ndriçimit të plotë të të gjitha rrethanave që lidhen me rastin.
Zyrtari policor konsiderohet i pafajshëm deri në një vendim përfundimtar të gjykatës.
