Gjykata Supreme e Kosovës ka reaguar ndaj deklaratës së anëtarit të Vetëvendosjes në KQZ, Alban Krasniqi në mbledhjen e 1 shtatorit.
Në një reagim të Supremes thuhet se gjuha e Krasniqit ndaj këtij institucioni dhe gjyqtarit Zenel Leku, është e papranueshme.
“Gjykata Supreme dënon ashpër këtë gjuhë reagimi të paprecedent dhe konsideron se deklaratat e tilla, përveçse janë të papranueshme, përbëjnë sulm të drejtpërdrejtë ndaj integritetit të një gjyqtari dhe sistemit të drejtësisë në Kosovë. Lakimi dhe krahasimi i emrit të gjyqtarit Zenel Leku është tentativë e ulët për ta dëmtuar figurën e tij dhe për ta minuar besimin në drejtësi”, thuhet në reagim.
Tutje sipas Supremes, shpikja e teorive konspirative, etiketimet dhe përpjekjet për denigrim të figurave të gjyqtarëve të Gjykatës Supreme në një institucion si KQZ, ku pritet maturi, qartësi dhe respekt, tregon mungesë të kulturës politike. Qytetarët e Kosovës kanë nevojë për përfaqësues që i respektojnë institucionet, jo të tillë që përpiqen t’i delegjitimojnë ato, me akuza pa fakte.
“Në një shtet demokratik, është gjyqësori ai që garanton barazinë dhe drejtësinë zgjedhore derisa përpjekjet për ta diskredituar një gjyqtar të instancës më të lartë gjyqësore, janë të dëmshme e të papranueshme, për gjykatën, gjyqtarin dhe gjithë shoqërinë. Gjykata Supreme, vendimet e saj i bazon në Kushtetutë dhe ligj, dhe asnjëherë nuk do të jetë në shërbim të politikave ditore”, thuhet në reagim.
Krasniqi ka kritikuar PZAP-në dhe Gjykatën Supreme për certifikimin e Listës Serbe për zgjedhjet lokale.
