Paneli Zgjedhor për Ankesa dhe Parashtresa (PZAP) ka marrë vendim për të shtatë ankesat që kishte shqyrtuar pas shpalljes së rezultateve përfundimtare të zgjedhjeve të 28 dhjetorit nga Komisioni Qendror i Zgjedhjeve (KQZ).
Nga ky moment ka nisur afati 48-orësh për ankesa në Gjykatën Supreme.
Deri tani, në Supreme është paraqitur vetëm një ankesë nga Partia Rome e Bashkuar e Kosovës, bëri të ditur zëdhënësja e Gjykatës Supreme, Antigona Uka.
“Bazuar në informacionet nga Zyra për Menaxhimin e Lëndëve, në Gjykatë Supreme, deri më tani, është pranuar një (1) ankesë administrative, kundër vendimit të PZAP-së, nga Partia Rome e Bashkuar e Kosovës”, tha ajo.
Ajo shtoi se Gjykata Supreme ka afat pesë ditë për të vendosur për të gjitha ankesat pasi të mbarojë afati për paraqitjen e tyre.
Nga të shtatë ankesat e shqyrtuara nga PZAP, vetëm ankesa e Listës Srpska është aprovuar për mosshpalljen e rezultatit përfundimtar, ndërsa gjashtë të tjera janë rrëzuar.
Pas vendimeve të Gjykatës Supreme për ankesat e pranuara, KQZ do të ketë rrugë të hapur për të certifikuar rezultatet përfundimtare të zgjedhjeve.
