Gjykata Supreme e Kosovës ka ndryshuar pjesërisht vendimet e Gjykatës Themelore në Pejë dhe të Gjykatës së Apelit në rastin e Edmond Lajqit, duke ia zëvendësuar dënimin me burgim të përjetshëm me 30 vjet burgim.
Vendimi u mor pas shqyrtimit të ankesës së mbrojtjes së të dënuarit dhe përgjigjes në ankesë nga përfaqësuesja e autorizuar e palës së dëmtuar. Supreme e ka aprovuar pjesërisht ankesën vetëm sa i përket masës së dënimit, ndërsa pjesët tjera të aktgjykimeve kanë mbetur në fuqi.
Lajqi ishte shpallur fajtor për veprën penale të vrasjes së rëndë dhe për mbajtje, kontroll ose posedim të paautorizuar të armëve. Sipas vendimit të ri, atij i shqiptohet dënimi prej 30 vitesh burgim, ku do të llogaritet edhe koha e kaluar në paraburgim, prej 16 prillit 2024.
Gjykata Supreme ka vlerësuar se gjykatat më të ulëta e kanë vërtetuar drejt fajësinë e të pandehurit dhe cilësimin juridik të veprave penale, duke mos gjetur shkelje të procedurës penale apo të ligjit penal në këtë aspekt.
Megjithatë, sipas Supremes, dënimi me burgim të përjetshëm nuk ishte arsyetuar në përputhje me kriteret ligjore. Gjykata ka konstatuar se disa nga rrethanat e konsideruara si rënduese nuk kishin mbështetje të mjaftueshme në prova, ndërsa disa të tjera ishin pjesë përbërëse e vetë veprës penale dhe nuk mund të shërbenin si bazë për shqiptimin e dënimit maksimal.
Në arsyetimin e saj, Gjykata Supreme ka theksuar se burgimi i përjetshëm mund të shqiptohet vetëm në raste të jashtëzakonshme, kur ekzistojnë rrethana që e dallojnë qartë rastin nga veprat e tjera të ngjashme dhe kur një dënim më i butë nuk do të ishte proporcional me rëndësinë e veprës dhe fajësinë e kryerësit.
Pas vlerësimit të të gjitha rrethanave, Supreme ka konkluduar se në rastin e Edmond Lajqit nuk janë përmbushur kushtet për dënimin me burgim të përjetshëm. Për këtë arsye, duke u bazuar në parimet e proporcionalitetit dhe individualizimit të dënimit, ka vendosur që masa e përshtatshme e dënimit të jetë 30 vjet burgim.
