Sezoni 2026/27 në Superligën e Kosovës në futboll nis muajin e ardhshëm, saktësisht më datën 15 gusht kurse të hënën është tërhequr shorti në zyrat e Federatës së Futbollit të Kosovës.
Në xhiron e parë të Superligës, do të ketë përballje interesante ka njoftuar FFK, duke bërë të ditur se sezoni vjeshtor që nis më datën 15 gusht, do të përfundojë më datën 20 dhjetor.
“Sezoni vjeshtor nis më 15 gusht dhe përfundon më 20 dhjetor, duke premtuar muaj të mbushur me rivalitet, emocione dhe spektakël futbolli. Suksese të gjitha klubeve në rrugëtimin drejt një tjetër kampionati”, ka shkruar FFK.
Prej pesë ndeshjeve në xhiron e parë, dy të paktën pritet të jenë interesante dhe me rivalitet të fortë.
Kampionia në fuqi, Drita e nis mbrojtjen e titullit në shtëpi dhe atë kundër skuadrës së Llapit, ndërsa nënkampioni Ballkani do të luajë në udhëtim ndaj skuadrës së Prishtinës.
Krahas dueleve Drita – Llapi dhe Prishtina – Ballkani, në xhiron e parë do të jenë edhe përballjet Vushtrria – Malisheva, Drenica – Dukagjini dhe Feronikeli ’74 – Gjilani.
Vushtrria dhe Feronikeli ’74, janë skuadrat e rikthyera në elitën e futbollit kosovar pasi sezonin e fundit përfunduan në dy pozitat e para në tabelën e Ligës së Parë.
Mbetet të shihet se cilat do të jenë rezultatet e këtyre dy skuadrave, ndonëse Vushtrria ndeshjet si vendase i luan jashtë stadiumit “Ferki Aliu” për shkak të rinovimit të tij.
