Për të gjashtin vit me radhë, superheronjtë u rikthyen në Klinikën e Pediatrisë.
Përderisa superheronjtë zbresin nga katet e kësaj klinike lumturia e gëzimi po shihej në fytyrat e fëmijëve që po trajtoheshin këtu dhe atyre që erdhën për vizitë.
Ky aktivitet tradicional, i organizuar nga klubi alpin “Prishtina” në bashkëpunim me “Care for Kosova Kids”, këtë vit është realizuar në përmasa edhe më të mëdha, falë përkrahjes së institucioneve dhe donatorëve.
E nga kjo nismë më të gëzuar se kurrë dukeshin fëmijët, të cilët edhe treguan për të parapëlqyerin e tyre.
“Sot jam gëzuar shumë se edhe babi im është alpinist e më pëlqeu shumë”, u shpreh Jon Haliti.
“Më ka pëlqyer spidermani”, tregoi Ersen Temaj.
Kurse sipas organizatorit Kristian Gashi secili vit po del të jetë më i mirë se tjetri.
“Aktivitetin e organizojmë bashkë me Care for Kosova Kids është viti i gjashtë e është bërë aktivitet tradicional. Qëllimi kryesor është me i gëzuar sa më shumë fëmijët, përveç me i gëzuar kemi mbledh edhe fonde këtë vit”, tha ai.
I pranishëm në këtë aktivitet ishte edhe ministri në detyrë i shëndetësisë, Arben Vitia, i cili vlerëson lartë këtë aktivitet.
“Një moment gëzimi për fëmijët në Klinikën e Pediatrisë dhe për këtë bashkë me Klinikën e Pediatrisë jemi sot këtu, për të ndarë gëzimin që fëmijët e përjetojnë me superheronjtë mbrapa dhe për të ju dëshiruar shëndet mbi të gjitha, por dhe fundvit të mbarë”, deklaroi Vitia.
Të nderuar nga ky aktivet u shprehen së janë edhe vet Klinika e Pediatrisë.
“Ne si klinikë pediatrike kemi nderin dhe kënaqësinë që për vitin e gjashtë me radhë të mirëpresim superheronjtë në pediatri, një aktivitet humanitar që organizohet nga shoqata Care for Kosova Kids së bashku me klubin alpin Prishtina, për gjashtë vite me radhë vijë i gëzojnë fëmijët për tu treguar që fëmijët në spital nuk vijnë vetëm të shpohen të marrin injeksione por edhe të ndodhin gjëra të mira e me ju jap kurajo fëmijëve”, deklaroi Arbana Baloku-Zejnullahu.
Se ndjehet e emocionuar nga ndihma që dha për aktivimin e tregoi edhe Nermin Mahmuti, nga Fondi për Zhvillim.
“Është kënaqësi me qenë sot këtu. Unë, jam shumë e emocionuar po më duket vetja si fëmije se tek secili prej nesh e ka një fëmijë që janë brenda. I falënderoj klubin alpin dhe superheronjtë, por për mua heronjtë më të mëdhenj janë këta fëmijë”.
Kurse tash e ca vite në Klinikën e Pediatrisë kontribut japin edhe nga shkolla “Mitrush Kuteli”, në Prishtinë.
“Shkolla jonë zakonisht në fund vit bënë një donacion për pediatrin e fëmijëve, por ky vit ka qenë diçka tjetër se fëmijët janë pjesë e këtij aktiviteti. Ne jemi këtu për t’i mbështetur këta fëmijë moralisht emocionalisht dhe të tregojmë se të gjithë bashkëmoshatar e tyre lutën për shëndetin e tyre dhe ju qëndrojnë mbrapa”, deklaroi Remzije Kosumi-Raci, drejtoreshë nga shkolla “Mitrush Kuteli”.
E krejt në fund të këtij aktiviteti, fëmijët u lumturuan edhe më shumë me dhuratat që u shpërndanë nga alpinistët e shëndrruar në superheronjë për këta fëmijë.
