Një infermiere e Qendrës Kryesore të Mjekësisë Familjare në Prishtinë është sulmuar fizikisht teksa ishte duke kryer detyrën e saj profesionale në shtëpinë e një pacienti në lagjen “Kalabria”.
Rasti është bërë i ditur nga Oda e Infermierëve, Mamive dhe Profesionistëve të tjerë Shëndetësorë të Kosovës (OIK), e cila ka dënuar fuqishëm sulmin dhe çdo formë të dhunës ndaj profesionistëve shëndetësorë.
Në reagimin e saj, OIK thekson se profesionistët shëndetësorë duhet të jenë të mbrojtur dhe të sigurt gjatë ushtrimit të detyrës, veçanërisht kur janë në terren për t’u ofruar kujdes dhe ndihmë pacientëve.
“Dhuna ndaj tyre është e papranueshme dhe cenon drejtpërdrejt ofrimin e sigurt dhe cilësor të shërbimeve shëndetësore”, thuhet në reagimin e OIK-ut.
Oda ka kërkuar nga organet kompetente që rasti të hetohet me seriozitet dhe të ndërmerren të gjitha veprimet e nevojshme ligjore ndaj personit përgjegjës.
Sulmet ndaj personelit shëndetësor mbeten një shqetësim serioz, pasi cenojnë jo vetëm sigurinë e punonjësve, por edhe ofrimin normal të shërbimeve shëndetësore.
