Sulmet ajrore izraelite në Libanin jugor dhe lindor kanë vrarë të paktën gjashtë persona dhe kanë plagosur tre të tjerë, njoftoi Agjencia Kombëtare e Lajmeve shtetërore e Libanit, në shkelje të armëpushimit të ndërmjetësuar nga Shtetet e Bashkuara muajin e kaluar.
Ali Qassem Ahmad, kreu i këshillit bashkiak të Zellayas, dhe tre anëtarë të familjes u vranë në sulmin ndaj shtëpisë së tyre në qytetin perëndimor Bekaa, tha NNA.
Izraeli gjithashtu nisi një sulm në Libanin jugor duke përdorur avionë luftarakë dhe dronë, ndërsa fshati Mayfadoun u granatua me artileri, duke rezultuar në dy të vdekur, sipas NNA, citon Al Jazeera.
Grupi i armatosur libanez Hezbollah tha se ishte përballur me forcat izraelite, duke marrë përgjegjësinë për një sulm që synonte një grumbullim ushtarësh izraelitë.
Izraeli më vonë lëshoi urdhra për zhvendosje të detyruar për 12 fshatra në Libanin jugor, duke i paralajmëruar banorët të qëndronin të paktën një kilometër larg shtëpive të tyre.
Shumica e fshatrave të prekura ishin në veri të lumit Litani – një zonë që aktualisht nuk është nën pushtimin ushtarak izraelit.
