Besart Ibraimi ka shkëlqyer të enjten pasdite. Ai udhëhoqi Strugën drejt fitores në Ligën e Konferencës. Në ndeshjen e parë të raundit të tretë kualifikues, Struga e mposhti skuadrën nga Luksemburgu, Swift Hesperange me rezultatin 3:1. Të tre golat i shënoi sulmuesi me përvojë.
Në minutën e 23-të Ibraimi shënoi për 1:0. Për 2:0 konkretizoi penallti në minutën e 40-të. Ndërkohë skuadra nga Luksemburgu reagoi me të nisur pjesa e dytë.
Për 2:1 shënoi Dominik Stolz. Kampionia e Maqedonisë së Veriut, Struga, fitoi tjetër penallti në pjesën e dytë. Ibraimi mori përgjegjësinë dhe realizoi për 3:1 në minutën e 77-të. Ndeshja është luajtur në Qendrën Stërvitore të Federatës së Futbollit të Maqedonisë së Veriut në Shkup. Struga ka planifikuar të luaj në “Toshe Proeski” të Shkupit.
Por ky stadium, në të cilin u investuan dhjetëra miliona euro e ka fushën në gjendje shumë të keqe. Dhe UEFA nuk ka lejuar që ndeshja të luhet aty. Më 17 gusht, Struga luan në udhëtim ndaj Swift Hesperange. Por të enjte bëri hap të madh drejt kalimit në fazën e plejofit.
