Spanja dhe Belgjika do të përballen sonte në çerekfinalen e Kupës së Botës duke filluar nga ora 22:00.
Ndeshja do të zhvillohet në stadiumin “SoFi”, me spanjollët që hyjnë si një nga favoritët kryesorë për ta fituar trofeun.
Kampionët e Evropës kanë arritur deri në çerekfinale pa shfaqur ende potencialin e tyre maksimal, ndërsa vëmendja mbetet te talenti i Barcelonës, Lamine Yamal, i cili mbush 19 vjeç të hënën dhe pritet të ketë rol kyç në fazën vendimtare të turneut.
Spanja është skuadra e vetme që ende nuk ka pësuar gol në këtë Kupë të Botës. Ekipi i drejtuar nga Luis de la Fuente e përfundoi Grupin H në vendin e parë me shtatë pikë, pasi barazoi pa gola me Kepin e Gjelbër dhe më pas mposhti Arabinë Saudite me rezultat 4-0 dhe Uruguain 1-0.
Në fazën e eliminimit direkt, spanjollët fituan 3-0 ndaj Austrisë në raundin e 32 skuadrave, ndërsa në të tetën e finales eliminuan Portugalinë me rezultat minimal 1-0 falë golit të Mikel Merinos në kohën shtesë.
Në anën tjetër, Belgjika siguroi vendin e parë në Grupin G me pesë pikë, pas barazimeve 1-1 me Egjiptin dhe 0-0 me Iranin, si dhe fitores bindëse 5-1 ndaj Zelandës së Re.
Skuadra e drejtuar nga Rudi Garcia realizoi një rikthim spektakolar ndaj Senegalit në raundin e 32 skuadrave. Duke humbur 2-0 deri pesë minuta para fundit të kohës së rregullt, golat e Romelu Lukakut dhe Youri Tielemans e dërguan ndeshjen në vazhdime, ku Tielemans realizoi penalltinë vendimtare për fitoren 3-2.
Belgjika më pas eliminoi bashkëorganizatoren Shtetet e Bashkuara të Amerikës me rezultat 4-1, në një ndeshje që u shoqërua me polemika pas vendimit të FIFA-s për të pezulluar dënimin me karton të kuq të Folarin Balogun.
Tashmë, belgët do të përballen me sfidën më të madhe të turneut përballë një Spanje që ka treguar stabilitet të jashtëzakonshëm në mbrojtje dhe synon të vazhdojë rrugëtimin drejt titullit botëror.
Formacionet zyrtare:
Spanja: Unai Simon; Porro, Cubarsi, Laporte, Cucurella; Fabian Ruiz, Rodri, Olmo; Yamal, Oyarzabal, Baena.
Belgjika: Courtois; Castagne, Ngoy, Mechele, De Cuyper; De Bruyne, Raskin; Doku, Tielemans, Trossard; De Ketelaere.
