Komisioni Qendror i Zgjedhjeve do të mbajë sot (e diel), në orën 14:00, ceremoninë e tërheqjes së numrave për renditjen e subjekteve politike në fletëvotimin e zgjedhjeve të parakohshme për Kuvendin e Kosovës, të cilat pritet të mbahen më 28 dhjetor.
Ceremonia ishte planifikuar fillimisht për datën 8 dhjetor, mirëpo KQZ njoftoi të shtunën se aktiviteti do të zhvillohet një ditë më herët.
Vendimi u konfirmua nga zëdhënësi i institucionit, Valmir Elezi, pas mbledhjes së KQZ-së.
“Sipas vendimit të ri të KQZ-së, tërheqja e shortit për renditjen e subjekteve politike në fletëvotim, e paraparë të mbahet më 8 dhjetor, do të mbahet më 7 dhjetor 2025”, tha Elezi.
Ai shtoi se ndryshimi është bërë për të mundësuar miratimin më të shpejtë të dizajnit dhe përmbajtjes së fletëvotimit, si dhe për të nisur me kohë procesin e shtypjes.
Sipas tij, vendimi siguron edhe hapësirë shtesë për përgatitjet që lidhen me votimin me postë për votuesit jashtë vendit që e kanë zgjedhur këtë mënyrë.
KQZ ka konfirmuar se për ceremoninë e sotme janë ftuar të gjithë përfaqësuesit e subjekteve politike.
