Sot mbahet Samiti i liderëve të Ballkanit Perëndimor dhe Bashkimit Evropian në Mal të Zi.
Në Samit do të marrë pjesë dhe kryeministri i Kosovës, Albin Kurti, ndërsa takimi pritet të nisë në orën 9:15.
Kryeministri i Kosovës, Albin Kurti, dje ka publikuar fotografi nga darka e shtruar nga kryeministri malazes, Milojko Spajiq, në Kotor të Malit të Zi, ku edhe po mbahet Samiti i liderëve të Ballkanit Perëndimor dhe BE-së. Ai shihet duke shtrënguar duart me ndihmëssekretarin amerikan të Shtetit për Evropën dhe Euroazinë, Jim O’Brien dhe kryeministrin e Malit të Zi.
Ai ka thënë se gjatë këtij samiti do të diskutojë për përparimin në agjendën e platformës së Planit të Rritjes së BE-së dhe çështjet rajonale.
“Ne do të diskutojmë përparimin tonë në Agjendën e Reformës së Planit të Rritjes së BE-së dhe çështjet rajonale, duke përfshirë gjendjen e zbatimit të marrëveshjeve që kemi arritur në Procesin e Berlinit”, ka shkruar dje Kurti në “X”.
Shkuarjen e Kurtit në Kotor e ka konfirmuar ZKM përmes një komunikate, ku thuhet se sonte kryeministri do të marrë pjesë në darkën e liderëve të shtruar nga kryeministri malazez, Milojko Spajic.