Partia Socialdemokrate, ka dërguar të enjten në zyrat e Lëvizjes Vetëvendosje një ftesë për debat, ani pse kryetari i saj nuk u lejua të hynte brenda zyrave të LVV-së nga Policia e Kosovës.
Kryetari i PSD-së, Dardan Molliqaj theksoi se vendi ka mbetur pa opozitë, e sipas tij PSD është e vetmja parti opozitare që pushteti i “frikësohet”.
Molliqaj tha se PSD ka ftuar sot LVV-në për debat para zgjedhjeve për të diskutuar për ide e jo për siç tha ai, pazare siç diskutojnë me kryetarin e LDK-së e PDK-së.
“Në vende demokratike, pushteti frikësohet nga opizita. Ne kemi pasur një praktikë ku opozita është frikësua nga pushteti, por, siç e pash ky rrugëtim i Partisë Socialdemokrate për opozitë, jo për pazare i jepi efektet e para. Na bllokuan hyrjen me polici.. Vetëvendosja i tutet veç Partisë Socialdemokrate. Qysh e patë, edhe zyrtarët brenda u drodhën. Thonë ti që ka ardhë ndokush, PSD-ja ka ardhë, Dardani ka ardhë me media, me një zarf isha. Paramendoni me qenë PSD-ja në Kuvend, paramendoni qysh do të duken këta. Se këta janë mësuar me opozitarë që s’kanë as kredibilitet moral, as guxim politik, as vetëdije, as aktivizëm. Erdha sot me i sfidu i bindur, i vetëdijshëm që s’janë gati. Kosova ka nevojë për debat edhe erdha sot me e ftu Vetëvendosjen në debat para zgjedhjeve për ide, për diskutime, jo për pazare qysh diskutojnë me Lumirin e me Bedriun e me të tjerët”, tha Molliqaj.
Tutje, Molliqaj theksoi se Partia Socialdemokrate do të jetë partia e vetme opozitare, nëse arrijnë të hynë në Kuvendin e Kosovës, që jo në zyre, po edhe në Qeveri do t’u shkojnë pushtetarëve.
Sipas tij, nuk do të ketë më opozitë formale e të pazareve.
“Vetëvendosja po bën debat sot me partitë opozitare sepse i ka damkosur ato. Vetëvendosja e ka kryer betejën me këto parti që kanë qenë deri dje opozitë, beteja e vërtetë politike ideore është mes Partisë Socialdemokrate dhe Vetëvendosjes, kjo është sfida. E ftoj Vetëvendosjen, nuk qesim kriter. Cilindo kandidat të tyre prej 1 deri 110, me cilindo prej nesh, sa herë të duan, ku të duan, në cilindo debat, në cilindo emision. Nëse s’kanë gatishmëri për debat, nëse na frikësohen e i marrin policinë, nëse dridhen prej zarfeve, le të bëhen gati me u dridhë hala më shumë prej debateve, sfidave, aksioneve, protestave. Jo pse i duam ne, jo pse janë përse të këtyre, po sepse Kosova duhet me mbet vend demokratik… Prandaj ne jemi të bindur që Kosova e ka rastin unik, ne do ta bëjmë punën maksimale që Kuvendit të ardhshëm, pas 7 qershorit, t’i ofrojmë opozitë që s’e kanë parë. Qysh i shkuam sot në zyre të partisë, do t’i shkojmë në zyre të komisioneve, të qeverisë, të ministrave, nuk ka me pasur më qeverisje të qetë sepse nuk ka më opozitë formale e të pazareve. Opozita e vërtetë dhe përnjëmend është Partia Socialdemokrate”, tha Molliqaj.
I pari i PSD-së bëri të ditur se aktivitetet nuk do të ndalen, do të ftojnë përsëri në debat secilën parti derisa të marrin një përgjigje pozitive.
Përveç debatit, Molliqaj bëri të ditur për publikun se do të realizojnë një aktivitet për deklaratën e ministres në detyrë të Drejtësisë, Donika Gërvalla e cila ka deklaruar se e përkrah deklaratën e ish-deputetit të LVV-së, Fatos Gecit për katërshen e UÇK-së në Hagë.
