I dërguari i posaçëm i Bashkimit Evropian për dialogun Kosovë-Serbi, Peter Sorensen, ka qëndruar në Zagreb, ku ka marrë pjesë në Konferencën e Ambasadorëve të Kroacisë dhe është takuar me kryeministrin kroat, Andrej Plenkoviq.
Gjatë vizitës, Sorensen ka shprehur mirënjohje për mbështetjen që Kroacia i jep procesit të dialogut dhe përpjekjeve për normalizimin e marrëdhënieve ndërmjet Kosovës dhe Serbisë.
Ai ka vlerësuar gjithashtu angazhimin e Kroacisë për avancimin e procesit të normalizimit.
“Është mirë të jesh në Zagreb. Një kënaqësi e vërtetë të flas në Konferencën e Ambasadorëve të Kroacisë dhe të shkëmbej pikëpamje me kryeministrin Andrej Plenkoviq. Mirënjohës për mbështetjen e fortë të Kroacisë për Dialogun dhe përkushtimin e saj për avancimin e normalizimit të marrëdhënieve ndërmjet Kosovës dhe Serbisë”, ka shkruar Sorensen në X.
