Avokati, Shkëlzen Sopjani ka vlerësuar se mbajtja e seancës së Kuvendit për miratimin e buxhetit, marrëveshjeve ndërkombëtare dhe buxhetit të RTK-së, përpara seancës për zgjedhjen e Qeverisë së re të Kosovës, paraqet vështirësi nga aspekti ligjor dhe kushtetues.
Në emisionin “Ditari” në Tëvë1, Sopjani ka kujtuar se vendimi i mëhershëm i Gjykatës Supreme ndalon qeverinë në detyrë të marrë vendime të rëndësishme, përfshirë propozimin e projektligjeve, siç është edhe Ligji për Buxhetin.
“Është pak problematike nga këndvështrimi ligjor, duke pasur parasysh edhe vendimin e Gjykatës Supreme, e cila ka përcaktuar se një qeveri në detyrë, pra me kompetenca të kufizuara, nuk mund të marrë vendime të tilla. Qeveria në detyrë nuk mund të propozojë ligje në Kuvend, dhe kjo është e rregulluar me rregulloren për qeverinë”, tha Sopjani.
Sopjani ka kërkuar nga opozita që të reflektojë dhe të mbështesë zgjedhjen e Qeverisë së re, me qëllim që të shmangen problemet ligjore dhe kushtetuese që lidhen me miratimin e buxhetit të Kosovës.
Sipas tij, duke qenë se buxheti është dokument jetik për funksionimin normal të institucioneve, përfshirë pagesën e shërbyesve civilë, vendi nuk duhet të hyjë në bllokada të panevojshme.
“Votimi i buxhetit është jetik në fazën ku ka ardhur Kosova. Pa buxhet, nuk dihet si do të sigurohen mjetet për pagat dhe funksionet bazë të institucioneve.Do të ishte më mirë që fillimisht të zgjidhej Qeveria e re, e cila më pas do ta procedonte buxhetin në mënyrë të rregullt ligjore. Opozita duhet të reflektojë dhe ta votojë qeverinë, nëse ky është çelësi për t’i shmangur problemet ligjore e kushtetuese dhe për të siguruar miratimin e buxhetit”, ka deklaruar Sopjani.
Ndryshe, Kuvendi i Kosovës do të mbajë nesër (e mërkurë) dy seanca të thirrura nga grupi parlamentar i Lëvizjes Vetëvendosje, në përpjekjen për të çuar përpara procesin e formimit të Qeverisë së re, por edhe çështje të buxhetit e miratimin e marrëveshjeve ndërkombëtare.
