Juristi Shkelzen Sopjani ka vlerësuar se marrëveshja e arritur mes Lëvizjes Vetëvendosje (LVV) dhe Lidhjes Demokratike të Kosovës (LDK), që Bekim Sejdiu të jetë kandidat për president të Kosovës, nuk ofron garanci të mjaftueshme për shmangien e zgjedhjeve të reja apo për zgjedhjen e presidentit.
Sipas Sopjanit, pavarësisht arritjes së marrëveshjes, mbetet problem sigurimi i kuorumit të nevojshëm për votimin e presidentit në Kuvendin e Kosovës.
“Përkundër faktit që u arrit marrëveshja, nuk e di se sa ofron siguri për evitimin e zgjedhjeve dhe zgjedhjen e presidentit, marrë parasysh faktin që numrat për të cilët janë të përfaqësuara në Kuvend partitë, edhe LDK-ja edhe VV-ja, përjashtuar numrat e votave të pakicës, nuk garantojnë një minimum të nevojshëm prej 80 deputetëve”, ka deklaruar Sopjani.
Ai ka përmendur edhe kundërshtimin e deputetit të LDK-së, Avdullah Hoti ndaj kandidaturës së Sejdiut, duke thënë se kjo e bën situatën edhe më të pasigurt.
“Sot e pamë se menjëherë pas arritjes së marrëveshjes, njëri nga deputetët e LDK-së doli dhe e kundërshtoi këtë kandidaturë, duke thënë se nuk do ta votojë. Nëse kësaj ia shtojmë faktin që bashkë LDK-ja dhe VV-ja, me pakicat, të gjithë bashkë i kanë 82 deputetë, përjashto këtu Listën Serbe dhe dy deputetë të pakicave, si Duda Balje dhe Adem Hoxha, mbesin 80, minus Avdullah Hoti. Pastaj potencialisht mund të tërhiqet edhe ndonjë deputet tjetër i LDK-së”, ka thënë ai.
Sopjani ka vlerësuar se, në këto rrethana, marrëveshja mund të mos prodhojë zgjidhjen e synuar.
“Atëherë i bie që marrëveshja, në njëfarë forme, është arritur për të mos u arritur zgjidhja. Pra, marrë parasysh se kandidatura në fjalë, përkundër që Bekim Sejdiu, kandidati konsensual për president, e ka një profil të respektueshëm, nuk ka siguruar pajtueshmëri as brenda partisë që e propozoi, sepse e pamë që prezantimin e tij e bëri Abdixhiku në krah me Vjosa Osmanin”, është shprehur Sopjani.
I pyetur nëse beson se propozimi për kandidaturën e Sejdiut ka ardhur nga LDK-ja apo LVV-ja, Sopjani ka thënë se, bazuar në atë që është bërë publike, duket se propozimi ka ardhur nga LDK-ja pasi ai ‘u prezantua nga drejtuesit e LDK-së pas takimit mes palëve’.
“Ne brenda bisedimeve nuk kemi qenë, por me aq sa publikisht la të kuptohet që e ka bërë LDK-ja, sepse nëse nuk e ka bërë Abdixhiku këtë propozim dhe po e prezanton ai, atëherë kjo mua më duket papjekuri politike prej tij, sepse po merr përsipër diçka që ndoshta i mbetet vetëm si ‘patate e nxehtë’ në dorë dhe nuk garanton zgjidhje. Publikisht la të kuptohet që është bërë propozimi nga LDK-ja, me vetë faktin që e njëjta kandidaturë është prezantuar pas takimit nga akterët e LDK-së”, ka përfunduar Sopjani.
Ndryshe, Lëvizja Vetëvendosje (LVV) dhe Lidhja Demokratike e Kosovës (LDK) janë pajtuar që Bekim Sejdiu të jetë kandidat për president të Kosovës.
Marrëveshja u njoftua të hënën e 31 gushtit nga kreu i LDK-së, Lumir Abidxhiku, pas takimit me kreun e LVV-së, Albin Kurti.
“Nga të gjithë emrat që janë propozuar, jemi dakorduar për një emër – dhe, ai është prof. dr. Bekim Sejdiu”, tha Abdixhiku.
Në fjalën e tij para mediave, Sejdiu tha se e ka pranuar propozimin që të jetë kandidat për president, duke pasur parasysh kontekstin politik në të cilin ndodhet Kosova.
“Kjo mua më bën të ndihem i nderuar, pra besimi që më kanë dhënë të dy partitë politike”, tha Sejdiu para mediave.
Bekim Sejdiu është profesor i së drejtës në Universitetin e Prishtinës dhe ish-gjyqtar i Gjykatës Kushtetuese të Kosovës.
Që votimi për presidentin e ri të Kosovës të jetë i vlefshëm kërkohet prania e 80 deputetëve në Kuvendin me 120 vende.
Së bashku me 18 mandatet e LDK-së, janë të paktën 81 vota, mjaftueshëm për votimin e presidentit të ri, nëse të paktën 80 prej tyre do të qëndronin në sallë./teve1,info/
