Policia e Kosovës në Skenderaj ka arrestuar mbrëmjen e kaluar një person që ishte në kërkim nga organet e drejtësisë, për shkak të disa urdhëresave aktive të gjykatës.
Sipas njoftimit të Policisë, rreth orës 18:00 është ndaluar për kontroll një automjet me targa të Bosnjë e Hercegovinës. Gjatë verifikimit fillestar, është konstatuar se personi i ndaluar kishte ndryshuar mbiemrin, por pas kontrollimeve të detajuara është vërtetuar se bëhej fjalë për një person të kërkuar.
I dyshuari ishte subjekt i tri urdhëresave aktive nga Gjykata Themelore në Mitrovicë dhe dy letërreshtimeve nga Gjykata Themelore në Gjilan, për vepra penale që përfshijnë dëmtim apo asgjësim të pasurisë, trafikim me njerëz dhe falsifikim të dokumenteve.
Policia ka bërë të ditur se, bazuar në vendimet e gjykatës, i arrestuari ishte i dënuar me burgim në kohëzgjatje prej tre vitesh e tetë muajsh. Pas përfundimit të procedurave policore, ai është dërguar për vuajtjen e dënimit.
