Ekspert të marrëdhënieve ndërkombëtare theksojnë se është vendim politik i disa shtete të BE-së që nuk po dëshirojnë t’i liberalizojnë vizat për Kosovën për arsye të brendshme të tyre.
Profesori i Shkencave Politike, Dritëro Arifi, në një intervistë thotë se situata e sigurisë nuk duhet të ndikonte sa i përket lëvizjes së lirë në zonën Schengen.
Ai vlerëson se BE-ja po bënë diskriminim të rëndë karshi Kosovës, por edhe po e dëmton vendin sepse nuk e trajton barabartë në asnjë nivel.
“Për çështjen e vizave po besoj se situata e sigurisë nuk duhej të ndikonte sa i përket vizave sepse e njëjta gjë do të vlente edhe për Serbinë. Është absurde nëse BE-ja nxjerr këtë element sepse Komisioni Evropian qe 4 vjet në secilin raport e potencon që Kosova ka plotësuar të gjitha kriteret. Pra është vendim politik i disa shtete të be që nuk po dëshirojnë t’i liberalizojnë vizat për Kosovën për arsye të brendshme të tyre”.
“BE po bënë diskriminim të rëndë karshi Kosovës por edhe po e dëmton Kosovën sepse nuk e trajton barabartë në asnjë nivel. Sa ai përket statutit nuk mund të ndodhë derisa nuk na njohin 5 vendet e BE-së”, tha Arifi.
Ndërsa, Gzim Shala nga Instituti i Kosovës për Drejtësi (IKD), tha se është mjaft shqetësuese mos liberalizimi i vizave për Kosovën.
Sipas tij, edhe vendet tjera që qëndrojnë ndoshta edhe më keq se Kosova kanë liberalizim.
”Sa i përket liberalizimit të vizave është konstatuar se Kosova i ka përmbushur kriteret. Komisioni Evropian ka konsideruar se janë plotësuar të gjitha kriteret. Në aspektin tjetër se pse nuk janë liberalizuar vizat deri tani është vendim politik”.
“Në këtë drejtim është shqetësuese sepse edhe vendet tjera që qëndrojnë ndoshta edhe më keq se Kosova kanë liberalizim të vizave. Dhe ende nuk kemi edhe përkundër faktit se kemi plotësuar kriteret e kësaj natyre”, tha Shala./eo
