Kryetarja e Preshevës Ardita Sinani ka njoftuar se të martën kanë hyrë në fuqi ndryshimet në Ligjin për të drejtat pronësore të shtetasve të huaj, sipas të cilit shqiptarët e Luginës fitojnë të drejta pronësore në Kosovë.
Sinani ka thënë se ky vendim është një hap shumë i rëndësishëm për lehtësimin dhe mbështetjen e qytetarëve të Luginës.
Ajo po ashtu ka falënderuar kryeministrin Albin Kurti, ministren e Drejtësisë Albulena Haxhiu, si dhe Kuvendin e Kosovës që siç është shprehur kanë mundësuar miratimin dhe zbatimin e këtij ndryshimi.
“Me hyrjen në fuqi të ndryshimeve në Ligjin për të Drejtat Pronësore të Shtetasve të Huaj, bashkëkombasit tanë tani kanë të drejtë të jenë titullarë të të drejtave pronësore në territorin e Republikës së Kosovës, sipas kushteve të përcaktuara nga ligji. Ky vendim është një hap shumë i rëndësishëm për lehtësimin dhe mbështetjen e qytetarëve tanë. Një falënderim i veçantë shkon për Qeverinë e Republikës së Kosovës, Kryeministrin Albin Kurti, Ministren e Drejtësisë Albulena Haxhiu dhe deputetët e Kuvendit të Kosovës, të cilët bënë të mundur miratimin dhe zbatimin e këtij ndryshimi. Ky akt tregon përkushtimin e Kosovës për të mbështetur të drejtat e bashkëkombasve tanë. Ky vendim jo vetëm që lehtëson jetën e shumë qytetarëve, por edhe forcon lidhjet tona kombëtare dhe shpreh solidaritetin midis shqiptarëve kudo që janë”, ka shkruar ajo në Facebook./teve1.info/
