Në vendin e punës, 34 vjeçari, F.M gjeti vdekjen.
Ai tragjikisht ra nga skelet e vendpunishtes, ku mori lëndime të rënda të cilave nuk u mbijetoi.
Për këtë rast të ndodhur të mërkurën, është arrestuar pronari i kompanisë ndërtuese.
“Në lidhje me rastin, i dyshuari N.B., pronar i kompanisë ndërtimore, pas intervistimit me vendim të Prokurorit të Shtetit është ndaluar për 48 orë, si i dyshuar për veprën penale “Asgjësimi, dëmtimi apo heqja e pajisjeve dhe rrezikimi në vendin e punës”, ka thënë Shaqir Bytyqi – zëdhënës i Policisë për rajonin e Prizrenit.
Hetimet për këtë rast janë duke vazhduar ende, për të cilat Prokuroria nuk ka dhënë detaje.
Një ditë më pas në këtë vendpunishte është ndalur puna shkaku i vendimit të Inspektoratit të Punës
Por, ky vend nuk ishte i panjohur për Inspektoratin e Punës.
Dy muajt e fundit, ishin kryer inspektime, gjobitje dhe ishin marrë vendime për ndalim të punimeve për shkak të mosrespektimit të masave të sigurisë në vendin e punës.
Për herë të parë, më 5 gusht të këtij viti, Inspektorati i Punës mori vendim për ndalje të punimeve në këtë ndërtesë.
Një muaj më vonë, më 9 shtator, në riinspektim të vendit për të monitoruar zbatimin e vendimit për ndalim të punimeve, Inspektorati i punës konstatoi se vendimi nuk ishte zbatuar, duke shqiptuar gjobë dhe duke e lënë në fuqi vendimin për ndalim të punimeve.
Por as kësaj radhe, kjo masë nuk kishte gjetur zbatim.
Kjo u konstatua vetëm 15 ditë para rastit tragjik të vdekjes së punëtorit.
“Me kërkesë të Kryeinspektorit, për të verifikuar nëse po zbatohet vendimi për ndalimin e punimeve, më datë 13.10.2025, Inspektorët e Punës të Rajonit të Prizrenit kanë vizituar përsëri subjektin për të monitoruar zbatimin e vendimit. Gjatë këtij inspektimi, inspektorët kanë hartuar raportet zyrtare dhe kanë shqiptuar gjobë ndaj subjektit si pasojë e mosrespektimit të vendimit”, thuhet nga Inspektorati i Punës.
Televizioni ka kontaktuar edhe me kompaninë ndërtuese “Bytyqi Constructions”, por të njëjtit nuk pranuan të deklarohen për rastin.
Sipas Inspektoratit të Punës, kompania ndërtuese ka edhe gjoba të tjera dhe i janë ndaluar punimet edhe në kantiera të tjerë ndërtimi, për shkakun e njëjtë, mosrespektim të masave të sigurisë.
