Eksperti i çështjeve politike, Ilir Kulla, në emisionin “Matrix” në Tëvë1, foli për situatën e tensionuar mes Kosovës dhe Serbisë, duke analizuar rrënjët historike dhe momentet kyçe që sollën konfliktin mes dy vendeve.
Kulla theksoi se bashkëjetesa mes Kosovës dhe Serbisë ka zgjatur për më shumë se 100 vite, por që konflikti i armatosur nisi në momentin kur të rinjtë e Kosovës, jo intelektualët, vendosën të ndahen nga Serbia dhe të luftojnë për pavarësi.
“Kosova ka jetuar bashkë me Serbinë për një shekull, por Serbia mori rrugën e saj kur Ushtria Çlirimtare e Kosovës (UÇK), djemtë dhe vajzat e fshatrave të Kosovës, vendosën të dilnin përballë tankeve serbe me armët e tyre. Kjo nuk ishte një iniciativë intelektuale, por një vendim i popullit në terren për liri,” tha Kulla.
Ai u bëri thirrje shikuesve të ndjekin dokumentarët serbë që dokumentojnë betejat në Drenicë dhe Kosharë, duke shpjeguar se sa ushtarë janë humbur në këto beteja, si dhe përpjekjet e mëdha që Serbia ka bërë për të mposhtur Ushtrinë Çlirimtare.
“Dokumentarët serbë edhe vetë theksojnë rëndësinë e rezistencës së familjes Jashari dhe sa janë përpjekur të përdorin forcë maksimale për ta mposhtur atë. Mendoj se nëse familja Jashari do të kishte pasur më shumë armë, rezistenca do të ishte edhe më e fortë dhe ushtria serbe do të ishte detyruar të tërhiqej më shpejt,” tha Kulla.
Komentet e tij erdhën në një kohë kur marrëdhëniet mes Kosovës dhe Serbisë mbeten të tensionuara, dhe ku debatet për të kaluarën dhe të ardhmen e raportit të tyre vazhdojnë të jenë një temë kryesore politike dhe sociale.
Kulla gjithashtu theksoi rëndësinë e kujtesës historike dhe nevojën që brezat e rinj të njohin sakrificën e atyre që luftuan për lirinë e Kosovës, duke vlerësuar rolin kyç të popullit të zakonshëm dhe jo vetëm të elitës intelektuale në këtë proces.
