Simptomat që bagëtitë kishin ngjallën dyshime.
E dyshime këto që më pas u konfirmuan edhe nga përgjegjësitë e Agjencisë së Ushqimit dhe Veterinarisë.
Nga ky institucion treguan se në Marec të Prishtinës e në Brus të Lipjanit janë paraqitur raste të sëmundjes “gjuha e kaltër”, që prek delet, gjedhet dhe dhitë.
Tëvë1 vizitoi njërin nga fermerët që kjo sëmundje i ka prekur delet që mban.
Sadik Heta, Drejtor i Shëndetit dhe Mirëqenies së Kafshëve tregoi për televizionin se si veprohet në këso raste.
“Gjithmonë në këto raste vendosim fermën në karantinë, ndalojmë lëvizjen e kafshëve nga këto zona. Pikërisht që të mos bëhet përhapja e sëmundjes edhe në ferma tjera, duke pasur parasysh që lëvizja e kafshëve mundet të jetë një nga shkaktarët kryesorë të bartjes së sëmundjes. Ne karantinimin e kemi gjithmonë si masë të parë preventive për parandalimin e përhapjes së kësaj sëmundje”, thotë Heta.
Por si transmetohet kjo sëmundje?
“Është sëmundje me karakter ekonomik, nuk është zonotik, nuk transmetohet nga kafshët te njeriu. Njerëzit duhet të jenë të qetë sa i përket kësaj sëmundje. Kjo sëmundje transmetohet nga ana e insekteve në këtë rast të mushkonjave të familjes Colicoides. Ne gjithmonë bëjmë gjurmim edhe në ferma të tjera për të parë prezencën ose jo të kësaj sëmundje. Shpresojmë të mos kemi raste të reja”, tregon Heta
Se cilat janë masat parandaluese që duhet të ndërmarrin fermerët tregoi edhe veterinari Bledion Rushiti.
“Është e rëndësishme që të bëhet spreji kundër insekteve nëpër stalla, pastaj repelimi quhet një formë tjetër e luftimit të sëmundjes e që ka rezultuar e suksesshme në fermat ku është aplikuar repilimi i rregullt. Atëherë mushkonjat kanë ardhur në sasi të vogël ose nuk kanë ardhur fare dhe është shumë e rëndësishme të evitohen kullotat në temperatura të larta e më lagështi të lartë”, ka thënë Rushiti.
Rushiti apelon te fermerët që të kenë kujdes të shtuar gjatë kësaj kohe.
