Shtatë ushtarë izraelitë u vranë të martën në qytetin jugor të Gazës, Khan Younis, pasi automjeti i tyre i blinduar u godit nga një mjet shpërthyes, njoftoi një zyrtar ushtarak izraelit të mërkurën.
Ky ishte një nga incidentet më vdekjeprurëse për ushtrinë izraelite brenda Gazës që nga fillimi i luftës më 7 tetor 2023. Deri më tani, mbi 860 ushtarë izraelitë janë vrarë që nga ajo ditë, përfshirë më shumë se 400 gjatë luftimeve në territorin e Gazës.
Në të njëjtën zonë të Khan Younis, një ushtar tjetër u plagos rëndë të martën si pasojë e zjarrit të armëve të vogla, bëri të ditur ushtria izraelite.
Brigadat Al-Qassam, krahu ushtarak i Hamasit, deklaruan përmes kanalit të tyre në Telegram se kishin ngritur një pritë ndaj ushtarëve izraelitë që ishin strehuar në një ndërtesë banimi në jug të Rripit të Gazës. Sipas tyre, disa ushtarë u vranë dhe të tjerë u plagosën pasi u goditën nga një raketë Yassin 105 dhe më pas nga një tjetër raketë në jug të Khan Younis. Më pas, luftëtarët e Al-Qassam e sulmuan ndërtesën me mitralozë, raporton AP.
Nuk është ende e qartë nëse këto dy incidente janë të lidhura mes tyre apo bëhet fjalë për ngjarje të ndryshme.
Ndërkohë, numri i civilëve palestineze në Rripin e Gazës ka kaluar tashmë shifrën 56,000 që prej fillimit të konfliktit.
