Shqipëria do të kërkojë fitoren e dytë radhazi në edicionin e ri të Ligës së Kombeve, teksa sonte nga ora 20:45 përballet me San Marinon në stadiumin “San Marino” në Serravalle.
San Marino e nisi aventurën në Ligën C me një humbje të thellë 7-0 në shtëpi ndaj Finlandës. Kjo ishte disfata më e rëndë e saj në shtëpi që nga nëntori i vitit 2021, ndërsa forma e fundit nuk jep shumë arsye për optimizëm.
Përfaqësuesja e San Marinos nuk ka fituar në 15 ndeshjet e fundit, duke regjistruar një barazim dhe 14 humbje. Gjatë kësaj serie ka pranuar 56 gola, ndërsa në pesë nga shtatë ndeshjet e fundit të zhvilluara në Serravalle ka mbetur pa shënuar.
Në anën tjetër, Shqipëria e nisi këtë edicion me fitore 2-0 ndaj Bjellorusisë, duke i dhënë fund një serie prej pesë humbjesh radhazi në ndeshjet ndërkombëtare.
Kuqezinjtë synojnë të nisin një edicion të Ligës së Kombeve me dy fitore radhazi për herë të parë dhe të rikthehen sa më shpejt në Ligën B.
Shqipëria ka marrë tri fitore 1-0 në katër ndeshjet e fundit si mysafire, ndërsa fitoren e fundit jashtë fushe me më shumë se një gol diferencë e kishte regjistruar në qershor të vitit 2023.
Në përballjet direkte, San Marino nuk ka arritur të marrë asnjë rezultat pozitiv ndaj Shqipërisë, ndaj kuqezinjtë synojnë ta vazhdojnë dominimin edhe në sfidën e sontme.
Ndeshja San Marino – Shqipëri zhvillohet sonte nga ora 20:45.
