Një person është shoqëruar në stacion policor gjatë aksionit për lirimin e hapësirave që janë në pronësi të Ministrisë së Bujqësisë, Pylltarisë dhe Zhvillimit Rural në Prishtinë.
Ngjarja ka ndodhur në hapësirat ku po zhvillohet aksioni për lirimin e objekteve afariste “Eida & Patroni” dhe “Liria”, përballë objektit të Agjencisë së Kosovës për Inteligjencë (AKI).
Sipas informacioneve nga vendi i ngjarjes, personi ishte shfaqur brenda perimetrit të sigurisë të vendosur nga Policia e Kosovës. Zyrtarët policorë i kanë kërkuar që të largohej jashtë shiritit policor, mirëpo pas një diskutimi me një nga policët prezentë, është dhënë urdhër për shoqërimin e tij në Polici.
Disa pjesëtarë të Policisë së Kosovës më pas e kanë shoqëruar personin deri te vetura policore që ndodhej afër vendit të ngjarjes, pa përdorur pranga.
Aksioni për lirimin e pronave të Ministrisë së Bujqësisë po zhvillohet nën masa të shtuara sigurie dhe me asistimin e Policisë së Kosovës.
