Kanë mbetur më pak se dy javë deri në shpalljen e aktgjykimit.
Shpresat se ish-krerët e UÇK-së që po mbahen në Hagë, do të lirohen, janë të mëdha.
Nga Shoqata e Familjeve të Dëshmorëve të UÇK-së, aktakuzën e ngritur e quajnë absurde.
Sipas Xhavit Jasharit nga kjo Shoqatë, i gjithë procesi është shoqëruar me probleme.
“Aktakuza është absurde siç e kemi thënë edhe më herët dhe ne presim që verdikti përfundimtar të jetë lirues për krerët e UÇK-së, sepse deri më tani nuk ka të provuar për çfarë është ngritë vet kjo Gjykatë, për çka akuzohen krerët e UÇK. Këtu kemi më shumë politikë dhe më shumë Gjykatë politike dhe ju e dini se nuk e kemi njohur këtë Gjykatë”, u shpreh Jashari.
Sipas tij, misioni i saj që nga fillimi ishte njollosja e shtetit dhe luftës së drejtë.
“Tendencat e kësaj Gjykate kanë qenë për të njollosur luftën e UÇK-së, për të prekur në lirinë e Kosovës dhe në shtetin e Kosovës dhe nëse merr vendim politik në verdiktin përfundimtar kjo Gjykatë që ne i druhemi edhe kësaj mendoj që këtu qëllim dhe target kryesor ka qenë UÇK-ja”, tha Jashari
Në anën tjetër, avokati Zahir Hamza vlerëson se faza e dëgjimit të dëshmitarëve mund të ndikojë në një vendim pozitiv për ish-krerët e UÇK-së.
“Kemi disa raste të dëshmitarëve të cilët Prokuroria është bazuar në dëshminë e tyre në formë të shkruar të cilën e kanë mohuar dhe nuk e kanë thënë ata dhe këtu e zbeh kredibilitetin e dëshmisë dhe dëshmitarëve të tyre dhe këtu më së miri do të vlerësojë Gjykata këto prova a janë kredibile, a janë të vërteta dhe burimi i këtyre deklaratave, dëshmive të tyre”, vlerëson avokati.
Më 12 shtator, katër ditë para shpalljes së aktgjykimit ndaj Thaçit, Veseli, Selimit dhe Krasniqit, në Prishtinë është paralajmëruar mbajtja e Marshit për liri, nismë kjo që synon të përcjellë zërin e qytetarëve për drejtësi, dinjitet dhe respekt ndaj historisë së Kosovës.
