Janë bërë më shumë se dy vjet, që në këtë vend nuk është punuar asgjë.
Kësisoj, edhe rruga për te ky objekt është e pakalueshme për shkak të mosrregullimit të kësaj pjese. Ky është objekti i shkollës fillore “Halil Alidema” në Pozheran të Vitisë, i cili ka filluar të ndërtohet qysh në vitin 2016.
Për shkak të mungesës së objektit, rreth 500 nxënësit e kësaj shkolle u detyruan të kalojnë në shkollën e mesme në këtë fshat, ku vijojnë mësimin me 6 ndërrime me nga 20 minuta orën mësimore.
E mbingarkesa e madhe me nxënës, sipas drejtorit të kësaj shkolle, Mufail Halabaku, po e vështirëson shumë procesin mësimor. Madje, ai vlerëson se për shkak të kësaj, rrezikon që të mbyllet shkolla e mesme.
Të shqetësuar për neglizhencën në ndërtimin e këtij objekti, janë edhe prindërit të cilët thonë se po e mendojnë si opsion largimin e tërësishëm të fëmijëve të tyre nga kjo shkollë.
Këtë po e sheh shqetësuese edhe kryetari i Komunës, Sokol Haliti i cili thotë se nuk ka marrë përgjigje nga niveli qendror arsyen e mosndërtimit të kësaj shkolle. Teksa shton se ka kërkuar që ky projekt të kalojë në kompetencë të komunës, në mënyrë që të përfundohet në një afat të shpejtë.
Tëvë1 tentoi të marrë një qëndrim edhe nga kryeministri, Albin Kurti i cili gjatë javës qëndroi për vizitë në këtë komunë, por që i njëjti nuk pranoi të përgjigjet.
