Analisti politik, Selam Shkodra, ka komentuar garën për kryetar të Prishtinës, duke vlerësuar se rezultati i nesërm nuk do të jetë thjesht një fitore lokale, por një tregues i qartë i influencës së partive në kryeqytet.
Ai tha se nëse kandidati për kryetar nga radhët e LDK-së, Përparim Rama e merr fitoren, ajo fitore do të jetë kundër komplet Qeverisë dhe partisë së LVV-së.
“Në rast se Rama ka fitore, do të jetë fitorja kundër komplet qeverisë dhe VV-së. Por, edhe në rast se Çeku do ta mposht, dine se ka mposhtur një parti, e cila është tradicionale me themele të forta në kryeqytet…Pa koalicione nuk e ka mundur asnjëherë LVV-ja, LDK-në”, tha ai në emisionin “Këndi i Debatit” në Tëvë1.
Shkodra ka theksuar se kandidati Çeku ka zhvilluar një fushatë të organizuar mirë dhe dinjitoze.
“Çeku, për mendimin tim ka bërë një program të mirë, i ka ofruar diçka të mirë qytetarëve të vendit. Ka bërë fushatë jashtëzakonisht dinjitoze. I ka prekë të gjitha kategoritë e shoqërisë, grupeve të interesit. E ka ‘rrehë’ terrenin. Ky njeri nuk ka lënë vend pa shku dhe pa taku qytetarët e Prishtinës, por edhe në zonat rurale”, deklaroi ai.
Në garë për të parin e Prishtinës, është kryetari aktual Përparim Rama nga LDK-ja dhe kandidati i LVV-së, Hajrulla Çeku./teve1.info/
