Analisti politik, Selam Shkodra, nuk sheh mundësi që qeveria e re të formohet gjatë seancës së nesërme, duke e cilësuar situatën si një nga më komplekset pas proceseve zgjedhore në Kosovë.
“Qeveria nesër nuk do të bëhet. Situata me të vërtetë është shumë komplekse, ndoshta ndër situatat më komplekse që është pas proceseve zgjedhore pas çlirimit të Kosovës. Ka pasur përplasje të forta mes krahut të luftës dhe ish-presidentit Rugova, por që të dyja palët kanë qenë të emancipuara politikisht sesa që i kanë vendosur kërkesat e tyre në tavolinë”, ka thënë Shkodra.
Sipas tij, nëse do të ketë zgjedhje të jashtëzakonshme, pasojat për institucionet e vendit do të jenë serioze.
“Nëse futemi në zgjedhje të jashtëzakonshme, që sipas gjasave do të futemi, do ta kemi edhe krizën institucionale, do të thellohemi në krizë”, ka paralajmëruar Shkodra.
Analisti vlerëson se mungesa e një marrëveshjeje mes partive politike mund ta çojë vendin në një periudhë pasigurie dhe pa stabilitet politik. /teve1.info/
