Shkëndija do ta zhvillojë ndeshjen e fundit dhe vendimtare të fazës së ligës në kuadër të Ligës së Konferencës, një përballje që pritet të ketë peshë të madhe për të ardhmen evropiane të skuadrës tetovare.
Ekipi shqiptar nga Tetova do të përballet me AEK Larnacan në transfertë, në një ndeshje që nis nga ora 21:00 dhe që pritet të zhvillohet në një atmosferë të zjarrtë.
Aktualisht, Shkëndija pozicionohet në vendin e 21-të në renditje dhe për të ruajtur shpresat për kualifikim në fazën tjetër, i nevojitet të paktën një barazim.
Një fitore do ta përmirësonte edhe më shumë situatën e kuqezinjve, duke i afruar ata drejt objektivit historik të vazhdimit të garave evropiane.
Ekipi ka treguar paraqitje solide në disa nga ndeshjet e mëparshme dhe sonte synon të japë maksimumin për të arritur rezultatin e dëshiruar.
Në anën tjetër, AEK Larnaca gjendet në një pozitë më komode, në vendin e 10-të të tabelës me nëntë pikë të grumbulluara.
Skuadra qipriote tashmë ka siguruar pjesëmarrjen në fazën play-off, por do të kërkojë fitore për të përmirësuar pozicionin dhe për të synuar një renditje sa më të favorshme për vazhdimësinë e garës.
Përballja e sontme merr rëndësi të veçantë për Shkëndijën, e cila synon që me fitore eventuale ta vazhdojë rrugëtimin evropian .
