Në kuadër të luftës kundër kriminalitetit dhe përforcimit të sigurisë publike, Prokuroria Themelore në Prizren ka realizuar sot procesin e shkatërrimit të substancave narkotike të konfiskuara dhe të sekuestruara në raste të ndryshme penale.
Me autorizimin e Ushtruesit të Detyrës së Kryeprokurorit të Shtetit, Kryeprokurori i Prokurorisë Themelore në Prizren, Petrit Kryeziu, ka marrë pjesë në këtë proces, i cili është realizuar nga komisioni kompetent, i përbërë nga përfaqësues të Prokurorisë, Gjykatës dhe Policisë së Kosovës.
“Shkatërrimi është kryer nga komisioni kompetent, në përbërje të të cilit kanë qenë përfaqësues nga Prokuroria, Gjykata dhe Policia e Kosovës, në përputhje me procedurat standarde të veprimit”, thuhet në njoftim.
Gjatë këtij procesi janë shkatërruar sasi të konsiderueshme të substancave narkotike, përfshirë: marihuanë: 347 kg e 804.79 g, kokainë: 886.89 g, heroinë: 7 kg e 788.7 g, bimë kanabis: 8 copë, fara kanabisi: 100 kg + 37.7 g, kërpudha narkotike: 155.7 g, monedha të letrës: 160 euro, valixhe (çanta): 3 copë.
Ky aktivitet është mbështetur nga Programi për Çështje të Brendshme i Bashkimit Evropian në Kosovë (HAPE), i cili është financuar nga Bashkimi Evropian.
“Prokuroria e Shtetit mbetet e përkushtuar në luftimin e të gjitha formave të kriminalitetit dhe në mbrojtjen e sigurisë publike”, theksohet në njoftim./teve1.info/
