Protesta kundër vendimit të Gjykatës Speciale në Hagë ka vazhduar edhe sonte në Prishtinë.
Edhe në natën e katërt numër i madh qytetarësh janë mbledhur për ta kundërshtuar vendimin e Gjykatës Speciale, e cila dënoi ish-krerët e UÇK-së.
Çlirim Haziri, një nga organizatorët e protestave, ka thënë se protestat do të vazhdojnë deri në realizimin e kërkesës për drejtësi ndaj çlirimtarëve dhe paralajmëroi se protestat nuk do të ndalen.
Ai ka thënë se protestuesit nuk i ka bashkuar partia, por UÇK-ja.
Motoja e protestës është “Jo në emrin tim”.
Protestuesit shihen të mbajnë flamuj të ndryshëm me UÇK-në, e figurat e luftës.
Protestuesit po shprehin kundërshtimin e tyre ndaj aktgjykimit të shkallës së parë për Hashim Thaçin, Kadri Veselin, Jakup Krasniqin dhe Rexhep Selimin.
Altin Krasniqi, djali i Jakup Krasniqit nuk mungon as në ditën e katërt të protestës në Prishtinë kundër vendimit të Gjykatës Speciale për ish-krerët e UÇK-së.
