Me intonimin e himnit kombëtar dhe atij shtetëror, nis ceremonia përkujtimore.
Në fshatin Studenicë të Istogut, 26 vjet më parë dhjetë persona u masakruan mizorisht nga forcat serbe.
E para qe e merr fjalën është nëna Rrahime Lipaj, së cilës iu vranë dy vajza, njëra 15 dhe tjetra 13 vjeçare.
“Këtë liri e fituam me gjakun e dëshmorëve e martirëve, që u maltretuan në mënyrën më çnjerëzore, nuk u kursyen as fëmijët, u vranë e u hodhën në bunarë të shtëpisë. Ne qendruam aty nga 26 marsi deri me 12 prill. Por fati deshti se ato u kthyen për ndihmë t’i ndihmojnë gjyshes. U vranë e u masakruan, babai Sali Sokol Zeqiraj, nëna e bashkëshortit Sale Lipaj, Hajrije Lipaj dhe Hatmane Mehaj e cila ishte strehuar në atë shtëpi”, thotë ajo.
Për viktimat, janë thurur edhe vargje.
Kontributin e këtyre familjeve, e vlerësoi lartë Xhavit Jashari, kryetar i Shoqatës së Familjeve të Dëshmorëve.
“Veprimin dhe guximin e patën bijtë dhe bijat e luftës së lavdishme të UÇK-së dhe jo vetëm që mbajtën gjallë idealin e të parëve por e bënë realitet lirinë e kësaj pjese të atdheut që quhet Kosovë”, u shpreh Jashari.
E para të pranishmëve, foli edhe kryetari i Istogut, Ilir Ferati.
“Kur sot data shënon 13 prill dhimbja qëndron e njëjtë sikur e vitit 1999. E tash 26 vite familja Lipaj, Zeqiraj e Mehaj përkujton nga më të dashurit e tyre të cilët ranë për të ngritur si dëshmi të krimit serb në tërë Kosovën, në anën e Istogut e në zemrat e këtyre familjeve”, tha Ferati
Në fund të ceremonisë u ndanë disa dekorata, përderisa u vendosën edhe lule në Lapidarin e Martirëve.
