Tash e një shekull këto dyer kanë qenë të hapura për shumë nxënës.
Por këtë të mërkurë u hapën edhe për një arsye tjetër.
Kjo pasi shkolla “Rilindja” në Dritan të Drenasit të mërkurën e shënoi Ditën e Shkollës për të 100-ën herë.
Për këtë, shumë gjenerata u bën sërish bashkë, në ambientet e shkollës së parë të Drenasit.
“Si shkollë e parë në Komunë e Drenasit, shkolla “Rilindja” ka qenë një ndër shtyllat kryesore të përhapjes së dijës në këtë trevë. Nga bankat e saj kanë marrë mësim mijëra nxënës të fshati Dritan dhe fshatrave përreth. Historia e kësaj shkolle është e lidhur ngushtë edhe me historinë e kësaj shkollë ndërtimi i objektit të kësaj shkollë filloi në vitin 1923 kryesisht me punë vullnetarë të banorëve të fshatit Dritan dhe fshatrave përreth”, u shpreh Arsim Avdyli – drejtor i shkollës.
E për një pikë artistike, u kujdesen nxënësit e kësaj shkolle.
Në këtë ngjarje, nuk u harruan edhe shkollarët, mësimdhënësit e punëtorët e kësaj shkollë, që u vranë në luftën e fundit.
“Sot me krenari kujtojmë mësimdhënësit tanë që nuk e kishin vetëm profesion mësimdhënien, por e kishin mision. Se mësuesit tanë nuk e kishin vetëm profesion mësimdhënien, por e kishin mision e dëshmon më së miri jeta dhe vepra e mësuesit Fazli Grajqevci, mësuesi i kësaj shkolle. Se mësuesit tanë nuk e kishin vetëm profesion mësimdhënien, por e kishin mision e dëshmon më së miri jeta dhe vepra e ideologut të UÇK-së Fehmi Lladrovci, nxënës i kësaj shkolle”, u shpreh drejtori i Arsimit nw Drenas, Muhamet Gjoka.
E kujtimet nga bankat shkollore, i ka të freskta edhe ish-mësimdhënësi, Mehdi Ademi.
Ky i fundit me nostalgji, e kujton mësuesin Fazli Grajçevci, i cili vdiq nga torturat serbe në Burgun e Prishtinës.
“Gjatë viteve si nxënës kur kam filluar në vitet e 60-ta klasën e parë e kam pasur nderin të jem edhe nxënës i mësuesit Fazli Grajqevci, në vitin 1964 kur ka punuar në shkollën tonë “Rilindja”. Pastaj kam qenë edhe mësimdhënës në këtë shkollë ku kemi pasur përvoja vetëm të ditë të mira” Mehdi Ademi, ish – mësimdhënës.
Ndryshe, kjo shkollë fillimisht i kishte kishte 40 nxënës nga shumë fshatra te Drenasit.
E me rritjen e numrit të nxënësve iu shtuan edhe dy anekse, një më 1961 dhe tjetra më 1981.
