Në mbledhjen konstituive të Kuvendit të Komunës së Prizrenit, Shaqir Totaj u betua për herë të dytë si kryetar i komunës, duke premtuar se mandatin e ri do ta ushtrojë me nder, besnikëri dhe paanshmëri, me synimin për të krijuar kushte më të mira jetese për të gjithë qytetarët.
Gjatë fjalimit të tij, Totaj falënderoi qytetarët për besimin e dhënë, duke theksuar se angazhimi i tij do të jetë gjithëpërfshirës.
“Zotohem se së bashku do ta bëjmë Prizrenin edhe më funksional, edhe më të bukur, ashtu siç e meriton, përmes bashkëpunimit të drejtpërdrejtë me qytetarin”, deklaroi ai.
Në të njëjtën seancë u betuan edhe asambleistët e rinj, të cilëve kryetari u uroi suksese, duke nënvizuar rëndësinë e bashkëpunimit për të çuar përpara proceset që ndikojnë në përmirësimin e jetës së banorëve të komunës.
Në postimin e tij publik, Totaj ritheksoi zotimin për t’i përmbushur detyrat me integritet dhe për të shërbyer pa dallim politik apo shoqëror, duke falënderuar “nga zemra” të gjithë ata që i kanë dhënë mbështetjen për një mandat të dytë.
