Shabani në emisionin “Ditari” në Tëvë tha se Ukshin Hoti ka qëndruar stoik dhe se asnjëherë nuk është përkulur gjatë kohës kur gardianët e burgut i kanë goditur ata me lloje të armëve të forta e të metalta.
“Diçka që me ka lënë përshtypje të jashtëzakonshme është qëndrimi stoik i profesorit Ukshin Hoti në momentin kur na kanë sjellë prej Mitrovicës në burgun e Nishit. Ishte ai kordoni i gardianëve, policëve serbëve që ishin aty dhe neve na kanë futur në mesin e atyre kordonëve dhe kanë filluar goditjet me të gjitha llojet e armëve duke filluar prej shkopinjve, duke përfshirë edhe ato të metalta. Kështu që ka qenë shumë rëndë dhe ne të gjithë të burgosurit kur kalonim në atë kordon u mundonim ta mbulonim kokën duke u munduar që të shpëtonim së paku kokën. Por profesori i nderuar, Ukshin Hoti ka qëndruar vertikal, kurrë nuk është përkulur, pa marrë parasysh pasojat ai ka ecur nëpër atë kordonin dhe kjo gjë i shtynte edhe më shumë gardianët dhe faktikisht goditjet i kishin edhe më të mëdha,” rrëfeu Shabani.
Ndër të tjera Shabani në Tëvë1 u shpreh me fat që ka qenë bashkudhëtar i Ukshin Hotit në tri burgje, në Mitrovicë, në Nish dhe në burgun e Dubravës.
Kujtojmë se më 16 maj 1999 pas lirimit dhe pas daljes nga qelia e burgut të Dubravës, Ukshin Hoti zhduket nga polica serbe pa lënë gjurmë. Prej asaj kohe e deri tani, veprimtari i madh i çështjes kombëtare shqiptare, filozofi, shkrimtari, publicisti, atdhetari i përkushtuar, Ukshin Hoti edhe sot e kësaj dite konsiderohet ende i zhdukur.
