Shqipëria e Serbia po përgatiten maksimalisht për ndeshjen e së shtunës në Leskovc, që pritet të jetë vendimtare për vendin e dytë në grupin kualifikues për Kupën e Botës 2026 në futboll.
Te Serbia janë disa debutues, përfshirë këtu mbrojtësin e Bournemouthit, Velko Milosavleviq që është ftuar për herë të parë.
Në një intervistë për faqen zyrtare të Federatës së Futbollit të Serbisë, Milosavleviq e ka vlerësuar Kombëtaren e Shqipërisë.
Ai tha se e kishte parë ndeshjen të luajtur në Tiranë që përfundoi pa gola, duke thënë se Shqipëria ka ekip të mirë, por insistoi se Serbia është ekip më cilësor.
Edhe debutuesi tjetër te Serbia, sulmuesi Andrej Iliq që aktivizohet tek Union Berlini, ka folur për duelin me Shqëiprinë, të cilin e ka vlerësuar si tejet të vështirë.
Sipas tij, edhe ndeshja në Leskovc do të jetë e fortë sikurse në Tiranë, duke e vlerësuar si një derbi lokal por shtoi se Serbia futet në fushë për fitore.
Serbia ka mungesa të shumta për duelin ndaj Shqipërisë, në të cilin futet pas humbjes së thellë 5:0 që e pësoi nga Anglia.
Shqipëria është e dyta në grup me 8 pikë, një një shumë se Serbia që renditet e treta por që ka një ndeshje më pak të luajtur.
