Trajneri i Uruguait, Marcelo Bielsa, ka theksuar se ekipi që drejton është dashur t’i fitojë dy ndeshjet e para në Botëror, e në të cilat mori vetëm nga një pikë.
Uruguai është kampion i botës nga viti 1930 dhe 1950. Nisi me barazim 1:1 me Arabinë Saudite, ndërsa u ndal befasisht në barazim 2:2 nga Kepi i Gjelbër, të hënën në mëngjes.
70-vjeçari nga Argjentina ka theksuar se Uruguai e ka merituar fitoren në të dy ndeshjet.
“Duhej të kishim fituar. Edhe me golat që pësuam, prapë duhej të kishim fituar”, theksoi Bielsa.
Dy gabime në mbrojtje kushtuan me gola ndaj Kepit të Gjelbër. Bielsa ka thënë se përgjegjësia i takon atij si përzgjedhës. Por ka thënë se situatat që sollën golat janë “rrethana që ndodhin në futboll”.
“Është e qartë se ne paguam kosto të lartë për ato gabime. Është shumë e kushtueshme të pësosh gola të tillë”, ka thënë Bielsa.
Uruguain e pret ndeshje e vështirë ndaj Spanjës në përpjekje për të avancuar në fazën nokaut. Bielsa ka theksuar se ekipi i tij do të jetë i motivuar.
