Policia e Kosovës ka sekuestruar 9.4 kilogramë substancë të dyshuar narkotike të llojit marihuanë në fshatin Popoc të Gjakovës, në zonën e brezit kufitar. Për rastin është arrestuar një shtetas turk, i cili pas intervistimit është liruar.
Sipas Policisë, rasti ka ndodhur më 21 shtator, gjatë patrullimit dhe punës në terren të njësive policore të Drejtorisë Rajonale të Policisë Kufitare “Perëndimi” në Gjakovë.
Policia ka bërë të ditur se personat e dyshuar, një natë më parë, ishin ndjekur nga patrullat policore kufitare, ndërsa më pas kishin fshehur lëndën narkotike dhe kishin braktisur automjetin.
“Me datën 21 shtator 2026, gjatë patrullimit dhe punës intensive në terren të njësiteve policore të Drejtorisë Rajonale të Policisë Kufitare ‘Perëndimi’ Gjakovë, është arritur që të identifikohet dhe të lokalizohet vendi ku ishin fshehur disa lëndë narkotike”, thuhet në njoftimin e Policisë.
Në vendin e ngjarjes, policia ka gjetur tri çanta dhe një qese, të cilat ishin të mbushura me substancë të dyshuar narkotike të llojit marihuanë.
“Person/a të dyshuar kanë fshehur dhe kanë braktisur tri (3) çanta dhe një qese, të mbushura me lëndë narkotike të dyshuar të llojit marihuanë, në sasi prej nëntë kilogramë e katërqind gramë (9400 gramë)”, thuhet më tej në njoftim.
Një shtetas turk, i cili ishte identifikuar si i dyshuar në këtë rast, është arrestuar nga njësitë policore në Prishtinë dhe Mitrovicë të Jugut, të cilat ishin në asistim policor.
Lidhur me rastin janë njoftuar njësitë relevante dhe prokurori kujdestar i Prokurorisë Themelore në Gjakovë. Me urdhër të prokurorit është iniciuar rasti për veprën penale “blerje, posedim, shitje e paautorizuar e lëndëve narkotike”.
